Allāh Hū

Main-kade main baith ke, MaiN kehta Allāh Hū

Har ek jaam chor ke, MaiN peeta Allāh Hū

Ek sḫama ko dekh ke, bolun maiN Allāh Hū

Jal jal ke hota fanā, bas bachta Allāh Hū

Shabbīr ka sar hai nok-e-naiza, bole Allāh Hū

Haq hota hai yuN ayaN, keh keh ke Allāh Hū

La fata illa ʿAli, jo bole Allāh Hū

Ek zarbat kha ke bana, yun banda Allāh Hū

Haq bola hai yeh Nabī neiN, keh ke Allāh Hū

MaiN jiska maula ʿAlī maula haiN, Allāh Hū

Mera Mursḫid, mera Maula, mera Allāh Hū

Kho gaya meiN meiN kahaN, meiN sochuN Allāh Hū

---------------------------------------------------------------------------------

TRANSLATION IN ENGLISH

Sitting in a bar, I say Allāh Hū

Refusing all other drink, I drink Allāh Hū

Looking at one lamp, I say Allāh Hū

Burned and annihilated (fanā), only remain Allāh Hū

Sḫabbir’s (Al-Ḥusain alehi salam) head is on a spear, says Allāh Hū

The Truth (Ḥaq) is shining by saying Allāh Hū

La fata illa ʿAli (There is no victory without Ali) said Allāh Hū

On receiving the one strike on his head, the man became Allāh Hū

The Prophet said the Ḥaq (Truth), by saying Allāh Hū

Whose Maula (master) I am, Alī is the Maula, say Allāh Hū

My Mursḫid (teacher), my Maula (master) and my Allāh Hū

Where am I? I am lost, am I thinking, Allāh Hū.

Khat (Lakeir)

Kisi Ghayr Ne Bana Di Hamare Tumhare Beech Yeh Khat
Maan Baithe Jise Hum Patthar ki LakerieN

Yeh Mulk Humara Voh Tumhara
Na Tum Hamare Na Hum Tumhare

Na JaneiN Kon Se Lamhaat Ne Yeh Shigaf Dala Hai
Ki Patharon Se Bhi Aawaz Nikalti Hai YuN Pyare

Ek Dil Hamara Bhi Hai Jo Tuta Sa Hai
Phir KyuN Tum Karah Bharte Ho Sare Ke Sare

Ek Panchi Ki Tarah Ur Ke Pahunch Jai Koi
Farq Lakiron Ka Mita Ke Muqaddar Saware

Shab Ke Aagosh Main Voh Bhi KahaN Dikhta Hai
Kya Farq Bataya Hai Jo Na Samajh Aye Hamare

Is Khat Pe Khoon-e-Nahaq Kisne Bahaya Hai
Ki Har Goshe Se Aawaz Nikalti Hai Khudare Khudare

Hai Dua Bas Ki Nishan-e-Farq Mitayein
Phir Jo Ho Roshan Voh Ghar Hamare Tumhare

Haider Na Der Kar Ki Subha Namudaar Hai
Thaam Le Haath Ki Zindagi Basar Uske Sahare

Khoon-e-nahaq: innocent blood, Shigaf: divide

Tamaam-e-Hasrat

Nayi Subah Main Tujhe Salam Karta Hun

Teri Awaz Se Phir Kalam Karta Hun

Tumne Vada Kiya Ki Tum Inqilaab Laoge

Naya Sooraj Naya Mahtaab Laoge

NayiN Kiran NayiN Sonch Jagaoge

Har Dil Main Apna Maqaam Banaoge

Isi Ummeed Se Subah Sham Karta HuN

Ek Chiraagh Tere Naam Karta HuN

Bazm-e-Husn Main Ishq Ki Ma’rifat Hogi

Teri Chokhat Pe Apni Masarrat Hogi

Kuch Is Tarah Meri Mohabbat Hogi

Har Su Roshan, Teri Ibarat Hogi

Ek Hi Bas to Main Kaam Karta HuN

Teri Nazar se Peekar, Jaam Karta HuN

Har Lamha Isi Arzoo Pe Jee Raha Hun MaiN

Zindagi Tere Naam Se Pee Raha Hun MaiN

Tum Na Ho To Mujh Main Kya Paun MaiN

Khaaq Ban Ke Mitti Main Mil JauN MaiN

Kuch Na Baqi Rahe to Kya Daam Karta HuN

Har Fikr-e-Nasheman Ko Haraam Karta HuN

Naye Aur Purane Ko Dhoondh Kar DekhuN MaiN

Na Kuch Mila YahaN Taaza Na Baasi UsmaiN

Har Is Ummeed Pe Ki Tum Mere Paas Hote

Har Us Lamhe Ko Ji Raha HuN MaiN

Teri Ulfat Ke Paikar Bar-Sar-e-Aam Karta Hun

Teri Yadon se Hasrat Tamaam Karta Hun

-haider nakhojabadi

Qur'an

mahfil-e-nur main anwaar barasta hai Qur'an
ghazab yeh haal ki tashna hai jo saqqa hai Qur'an

karbala-o-shaam ke dar-dar pe thaharta vo hai
dekha jo use to nazar ata hai Qur'an

ek Qura'n naize pe karta hai bayaN
ashq jari hain mohibbon ke jo sunte hain Qur'an

hay hay layin marta durre kyun hai
durre parte hain to aah larazta hai Qur'an

innama kahke karta hai taharat ko ayaaN
yeh bhi Qur'an hai, tasdiq karta hai Qur'an

haiy maqtal main tune kiski rida chini hai
darbar-e-shaam main uryaan jo hota hai Qur'an

Qur'an banta hai gawaah in sitam zayifon ki
yeh jo bolein to samjho ki bolta hai Qur'an

ek Qur'an taaq se haider, yeh deta hai sada
daman-e-itrat ko gar pakroge to samjhoge Qur'an

Yaad

Mohabbat tham nahin pati, teri yaad ati hai
Fiza main gungunane ko yuN tanha chor jati hai

Mere qatil ki aastinon main khanjar kyonkar chipa hoga
Voh to dast-basta mujhko yuN qatl karke jati hai

Shama ki aarzoo ab ki parvanaa fanaa ho jaye
Khud voh jal rahi har dam, Yun ulfat nibhati hai

Tum hamse aj kyun khafa hote ho
Yun tumse alag hona ab namumkin judai hai

Ulfat ke har pal haider, tumne kaise sanjoye hain
Ki jab koi nahin hota, voh YuN milne ati hai

Rang (Color)

Paighame-e-maarifat ban gaya hai tu
Ek tasveer main dhal gaya hai tu

Subh se shaam muqarar teri khamoshi hai
Kuch Bol ki Haq ban gaya hai tu

Vaah kya akar ke chal raha hai tu
Yeh Kis rang main dhal gaya hai tu

Ab tor de zulm ki zanjiron ko
Kyon sonch ke sab chor gaya hai tu

Kya Kya Dekha

Subh aur Shaam in ankhoN ne kya kya dekha
Kahin darya kahin sehra dekha

Door ufaq pe maine dekha ek gul aur chaman
Dasht pe phir insaaN ko tarapta dekha

Tumhari yaad ne kar diya sairaab mujhko
Bhari mehfil main yeh jo dil tanha dekha

Eik Awaz ko sun ke pahuncha tere dar par main
jab bhari anjuman main khud ko ruswa dekha

Kar rahe ho kyoN ranj-o-buqa haider
kabhi kisi ko kya tumne apna dekha

At The Pacific Ocean

Tum se milne ki hasrateiN ab beparvaah hone LageeN
Jo samandar ki lahrein kinare se milne LageeN

Kuch Uchli, Kuch Machli aur kuch bal kha ke matki
Dil ki tanhaiyaN phir kuch behakne lageeN

Door Ufaq pe Aftaab Ghuroob hota hai
Ki Subh se ek vaada jo tum karkne LageeN

Dil kyuN tumhari yaad main afsurda Hai
Ki tasavvur main tum SanwarneiN LageeN

Ab tum mere paas in LahroN ki tarah a milna
Haider yeh sada sun ke voh Chahakne LageeN

shama roshan hai

voh jab ate hain to ghar kuch badal jata hai
unki khushboo se sab sanwar jata hai

shamma roshan hai phir bhi andhera sa lage
voh na hoN to dil kyoN thahar jata hai

har waqt har lamha intezaar aur beqaraar
unke ane ki khabar sun ke chahak jata hai

ab ki baras tum mere qareeb hona
tumhare na hone se dil tarap jata hai

yeh kya moijza hai ki tum mere paas ho
meri aarzoo ka jaam phir chalak jata hai

Yeh tumhare waswase or shokhiyaN haider
Noujawani main kyon Dil behak jata hai

Ya Maula!

Maula tera jo dar hai mere Dil ki Aarzoo hai
Tere hawale ya Rab ab meri Aabroo hai

Phir Duniyay-e-Mamlakat main ek Talatum hai
Par kyuN ho Dil parehsaaN tu jo mere Rubaroo hai

Sar ko kata duN ab maiN ki khud jo mita nahiN hai
Meri hasti mere Rehbar ab tujhmaiN Surkhuroo hai

Haider na der ho kahiN yeh voh Maqaam hai
Uski Raza, Uski Chahat ab teri Justujoo hai

Baqaa

kya poochte ho mujhko tujhse kya chahiye
tere ishq main fanaa hun, baqaa chahiye

tere dar pe khara hun tashna-lab kis qadar
ek jam-e-kausar nazron se ata chahiye

tumhari yaad, tumhara intezar aur dil-e-beqaraar
ab zindagi main iske siwa kya chahiye

aj jo ayina dekha to tum nazar aye
khudi se poochta hun ki khud ko kya chahiye

subh gulzaar hai aur shabnam ne lee hai angrai
bas yadon ke siwa gul ko kya chahiye

Ab kya mangoon, raza teri, khushi teri, sehar teri
jo tujh pe mit chuka ho use tujhse kya chahiye

haider kyon dhoondhte ho mehboob har dar pe apna
voh to kab se hai muntazir, aur kya chahiye

Husn Ki Mahvishein

Husn ki Mahvishein hazaar dekhi
Lakh jalwe bahaar dekhi
Na dekha koi tujhe hamsa chahne wala
Dil ki hasratein jo aar-paar dekhi

Neelaam mohabbat sar-e-bazar dekhi
Raz-e-haqiqat aas-paas dekhi
Na dekhi koi shama bazm main main roshan
Jali jo khud se to shahkaar dekhi

Hazaar janein jo tujhpe beqaraar dekhi
Ek Choti si jaan apni khaaksaar dekhi
Na dekhi koi aarzo-e-talab mujhme
Jo Ek nazar dil ke aar-paar dekhi

Phir Tasawwur main soorat teri aj dekhi
Ayina-e-majaz main khudi bhi sharmsaar dekhi
Na dekhi hamne dil ki aarzoo yuN qurbaaN
tere pehloo main ulfat jo beshumaar dekhi

bahut kam Dekhe

Jalwa-e-yaar ke charche idhar udhar dekhe
tujhe sarahne wale bahut kam dekhe

Ahl-e-shariyat aur Ahle-e-tariqat dekhe
Tere chahne wale bahut kam dekhe

Dekhe humne ishq ke unche unche dawe
jaan apni lutane wale bahut kam dekhe

Saqi-e-Kausar mila khudi se jo gaye hum
par yahaN pahuNchne wale bahut kam dekhe

Haider tum jo bane ho ghulam-e-boo-turaab
Yun Khaak maiN mitne wale bahut kam dekhe

Muntazar (awaiting)

Rahbar-e-ishq maiN haiN Khizar bhi Muntazar
Hai fizaa bhi Muntazar aur Chaman bhi Muntazar

Allah ke mehboob ki Jalwah FishaaaN nazroN se hai
Sham-o-sahar bhi Muntazir, do pahar bhi Muntazar

Raz-e-Mohammad hai kya, Jibrael se poocho
bal-o-par bhi Muntazar, Naqsh-o-qadam bhi Muntazar

Jab se liya hai hath, mehboob-e-awliya ho tum
hai raz-e-haqeeqat Muntazar, peer-e-tareeqat Muntazar

Gumbad-e-khazraN se tumko a rahi hai ek sada
karbal-o-sham ke haiN jo rehbar muntazar

Ibn-e-maryam-o-al-mahdi-o-sarkar ki amad ke sab
bahr-o-bar haiN muntazar, shams-o-qamar haiN Muntazar

Haider tu kooch kar hauz-e-kausar ki taraf
Hain Ahmed bhi Muntazar, Hasnain-o-Haider Muntazar

Jo Karna Hai.......

Jo karna hai kar lijye
Par meri khabar lijye

Is tute dil ki tarz suniye
aur chahe kuch mat suniye

chahe izhaar mat kijye
hamse pyaar par kijye

Khuda ki rehmat jo baniye
Is faqir ko chun lijye

DhuaaN (Smoke)

Jo uth raha hai dhuaaN kahaaN thaharta hai
Badal raha hai samaaN kahaaN thaharta hai

Lagi hai aag dil main mila hai tu jab se
Sukoon-e-dil ke liye aab-e-ravaaN kahaaN thaharta hai

Dile-e-shikasta ko aik arzoo ne bandha hai
shab-e-visaal ka kon-o-makaaN kahaN thaharta hai

Na jane kyon is waqt teri yaad ayi hai
Dile-e-nadaaN ka GumaaN kahaN thaharta hai

Chaman main gul se saba ne poocha hai
tere mehboob ka nasha kahaN thaharta hai

Barhe Jibrael is had se to bal-o-par jal jayein
Mere habeeb ki hadoN ka bayaaN kahaN thaharta hai

Ishq-e-Rasool, Ishq-e-Ali aur Ishq-e-Husain se
Haider teri qismat ka jahaaN kahaN thaharta hai

Unke Astane Pe

AyaN hai Koh-e-toor ka manzar unke astane pe
Chipe hain lakhoN pas-manzar unke astane pe

Bhatak raha tha Konain ki do rahon pe
Mila hai Jam-e-kausar unke astane pe

Yeh Junon-o-Ishq, yeh fana-o-baqa aur yeh bekhudi
Khuli hai raz-e-haqeeqat unke astane pe

Nasha aisa ki utarta nahin ab kyonkar
Mila hai saqi koi aisa unke astane pe

Chali simte ghayb se ek hawa aur machi halchal
Qafas udas ho kyonkar unke astane pe

Kya poochte ho usko kya mil gaya kaise
Jo kho chuka ho sab unke astane pe

Jo kuch nazar ata hai tu hi to nazar ata hai
Hui hai kaisi basharat unke astane pe

Ab kahan khojein kahan payein kise apna
Bana hai voh jo hamsafar tere astane pe

KruN phir sajdah yahaN dam bhar ke haider
Bana hun ghulam-e-mustafa tere astane pe

char din ki zindagi

Mahfil-e-Noor main pashemaaN hai char din ki zindagi
khud se juda hoke khud ki nigehbaaN hai aj kal ki zindagi

Is zindagi main nayi zindagi talashti hai zindagi
naye ufaq pe naya mehboob sanwarti hai zindagi

kyon is tarah phir apne ko pukarti hai zindagi
jaise sukoot-e-shab main kraharti hai zindagi

mere raqeeeb mere hamsafar mere shan-e-zindagi
mujh se rooth ke phir mujh ko manati hai zindagi

kabhi to apni khudi ki pahchaN kar aye zindagi
varna dar badar bhatakti rahegi pareshaN aye zindagi

kyon muskurata hai

subh pe sham pe kyon muskurata hai
tasawur pe khayal pe kyon muskurata hai

bazm-e-aam pe aur chalakte jaam pe
har ek baam pe kyon muskurata hai

sukot-e-shab pe aur ravish-e-dauraaN pe
dil-e-nadaaN pe kyon muskurata hai

taqdeer pe aur tadbeer ki aashufta giri pe
majrooh mohabbaton pe kyon muskurata hai

Rubaroo

mahfil-e-rubaroo main tu raz-e-guftagoo ban ja
jo jal rahi hai shama tu uski abroo ban ja

nahi tera koi sanee, nahin tera koi hamsar
gar hai haqeeqat, tu uski arzoo ban ja

ab firaq-e-yaar main koi jiye kyonkar
visal-e-yaar ki tu justujoo ban ja